مصر تفوز علي كوتديفوار نظرة فنية علي المباراة

مصر تفوز علي كوتديفوار نظرة فنية علي المباراة

كتب. د أحمد ثابت. 

أحسن مباراة تكتيكيًا لكيروش منذ توليه تدريب مصر. 

١-استخدام حمدي فتحي أمام الاتنين المساكين لإغلاق العمق الدفاعي و حماية طرفي الملعب و ساعده أيضا في الطلوع بالكورة في عملية البناء.(كنت اتكلمت علي اهمية وجوده قبل المباراة في المركز ده).

٢-استخدام مصطفي محمد في دور دفاعي مهم جدا في الضغط علي جان ميشيل سيري لاعب الوسط لمنع كوت ديفوار من بناء الهجمه.

٣-ترك الاستحواذ لكوت ديفوار مع استخدام سياسة الضغط low blcok مصحوب بتضييق المساحات و الخطوط متقاربة في وسط ملعبنا مع اللعب علي المرتدات للجناحين صلاح و مرموش في المساحه خلف دفاع كوت ديفوار و كان ممكن يسجل منها لولا اهدار الفرص. ( احنا عملنا ٢١ محاولة منهم ٥ علي المرمي فقط).

٤-ساعده في تنفيذ فكره اصابة كيسي لاعب وسط كوت ديفوار اضطر مدربهم يبدل مركز جان ميشيل سيري و نزول سيري دي مكانه عملت خلل عندهم اكتر في وسط الملعب و ساعده تألق الشناوي أيضًا.

٥-بصراحه جميع لاعبي منتخب مصر رجالًا اليوم و يستحقون التحية علي ادائهم :

•الشناوي : اعظم حارس عنده شخصية في القارة الافريقية .

•محمد عبد المنعم : شنطتك بعد البطولة و علي التتش ، ده حط هالر هداف دوري ابطال اوروبا في جيبه طول الماتش.

•حجازي : من أفضل المدافعين داخل قارة افريقيا من وجهه نظري.

•فتوح : لاعيب حريف اوي و يحسب ليه تألقه امام بيبي و اورير و ايقاف خطورة الجبهه ده.

•عمر كمال : اكتشاف في الجبهه اليمني. 

•حمدي فتحي : صمام الأمان لدفاع منتخب مصر.

•السوليه : كل تمريراته باسيستات .

•النني :افضل مبارياته مع منتخب مصر في البطولة .

•محمد صلاح :يكفي انه اقول انه صنع ٧ فرص لزملائه في المباراة ، ضربة جزاء الحسم كعادته.

•عمر مرموش : مهاري اوي و حريف اوي و شايفه مكنش يخرج .

•مصطفي محمد : دور دفاعي رهيب التحامات في كل مكان ناقصه اللمسة الاخيرة من اول البطولة

•محمد شريف : نزوله كان مهم لاستغلال سرعاته في ظهر دفاع كوت ديفوار ، و له ضربة جزاء صحيحة لم يحتسبها حكم ال var.

•زيزو : مجهود جبار و بيدي نشاط و حيوية.

•تريزيجيه : محتاج يلعب جماعي اكتر من كده.

•محمد ابو جبل : برافو ادي اللي عليه و زيادة و أنقذ كورة صعبة جدًا و ركلة ترجيح حاسمه.