لما يكون معاك واحد من أفضل (٣ ) لاعبين في العالم و متوصلوش للمرمي يبقي المدرب اللي غلطان ، بصوا علي معدل محاولات صلاح مع ليفربول في الماتش الواحد (٤.٣) ، صلاح مع كيروش مش بيروح للمرمي غير مجهود شخصي أو حاجه نادرة ، محمد صلاح أكثر واحد اتظلم بعدم وجود افشه و زيزو في تشكيل منتخب مصر اكثر اتنين ممكن يوصلوه للمرمي .
البعض قعد يتكلم في الاعلام في مباراة الذهاب شوفوا صلاح قدم ماتش عظيم و بيجري في كل مكان في الملعب و بيدافع و الحقيقة حتي لو فعلًا قدم اداء كويس بس ده مش صلاح اللي نعرفه هجوميًا ، صلاح عشان تقول عمل ماتش كويس بالنسبة ليه لازم يكون وصل للمرمي (٥ أو ٦) محاولات ده الطبيعي بتاعه ، لكن طول ما معاك مدرب مبيعملش حاجه غير انه بيرص اللاعبين وراه و بيطبق مرحلة الدفاع فقط ، معندوش اي اسلوب عن التحولات من الدفاع للهجوم ، معندوش اي حاجه عن بناء الهجمه من الخلف ، منتخب مصر بدون شخصية أصلًا ، احنا معملناش استحواذ علي الكورة دقيقتين متتاليتين علي بعض في اخر ٣ مباريات أمام السنغال .(مدة استحواذ مصر علي الكورة في الهجمة مش بتكمل من ١٥ ل ٢٥ ثانية و بنفقد الكورة).
منتخب مصر مع كيروش في آخر (٩) مباريات (٧ في كأس الأمم و ٢ امام السنغال في التصفيات النهائية) مسجلش الا خمسة اهداف فقط.
رقميًا مصر أمام السنغال في آخر (٣) مباريات معملتش غير سبع محاولات صحيحة بين ال ٣ خشبات في (٣٣٠) دقيقة و مصنعناش غير فرصتين محققين فقط ! ، دور المدرب صناعه الفرص مش اللاعب .
مدرب بيوظف صلاح غلط جرب مباراة نيجيريا في كأس الأمم يحطه مهاجم و منجحتش ، يقوم يحطه امبارح راس حربه و برده تفشل ، طبيعي هتفشل لإن مفيش راس حربه صريح تطلع عليه قدام أطوال السنغال ولا معاك لاعب بيعرف يحط الكورة تحت رجله و يجمع اللعب زي افشه او زيزو و يعملك التحول من الدفاع للهجوم ، محمد صلاح مش هيأخد الكورة من المرمى للمرمي و يرقص كل الفريق و يجبها هدف ، صلاح قوته كلها في مركز الجناح الأيمن لما بيدخل للعمق و يتحرك بدون كورة في الثلث الاخير من الملعب ، قوته في السرعه و الفينيش .
محمد صلاح مع كيروش لأول مرة مايسجلش ولا هدف في تصفيات كأس العالم ؛ لكن في تصفيات مونديال ٢٠١٨ سجل (٥) اهداف و تصفيات مونديال ٢٠١٤ سجل (٦) اهداف.
اللي هايقول طيب ما ياسر ابراهيم و حمدي فتحي و الشناوي و امام عاشور ادائهم هايل ، طبيعي لان احنا بندافع بس مش بنعمل باقي المراحل في كرة القدم.
أخيرًا مفيش حاجه اسمها صلاح متخاذل مع منتخب مصر ، صلاح أكتر واحد محتاج منتخب مصر و أكتر واحد كان نفسه يأخد كأس الامم و يوصل كاس العالم لان ده بيفرق معاه في حاجات كتير علي مستوي القيمة التسويقية و الجوائز ، يعني صلاح السنه ده خسر جائزه افضل لاعب في أفريقيا رغم انه هداف الدوري الانجليزي الا ان ماني يعتبر حسمها من شهر مارس و هينافسه ادوارد ميندي ، ده لو هتحسبها علي المستوى الفردي كمان.