الاهلي اكثر الأندية تعرض لظلم التحكيمي في أفريقيا
كتب الاعلامي، بقناة الاهلي، محمد فارس، موجها رسالة الي من يتطاولون علي الاهلي.بعد ركلة جزاء الاهلي ضد الرجاء المغربي في ذهاب دور ال 8 لبطولة دورى أبطال أفريقيا.
مهم جدا عشان هواة الكذب واللي مبقاش حد عارفهم في افريقيا فعايشين يتمسحوا في اي حاجة فيها اسم الاهلي عشان يبقى لهم صوت. اللي حصل امبارح موقف لا يدين لا الأهلي ولا مخرج المباراة ولا حكم المباراة. واغرب شئ واكتر شئ مضحك هو استغلاله من مشجعين لاندية لهم وقائع تحكيمية كارثية وبالورقة والقلم لمحاولة التشكيك في بطولات الأهلي اللي لولا الظلم التحكيمي كانت تخطت ال ١٠ القاب في دوري الابطال
الأهلي ده اللي في نهائي ٢٠٠٧ اتظلم ذهابا ايابا قدام النجم الساحلي عشان يتحرم من تحقيق البطولة الثالثة على التوالي . اتظلم من الحكم الكاميروني رافائيل ديفين في الذهاب ولم يحتسب ٣ ضربات جزاء لأبو تريكة وفلافيو و بركات وادى بركات انذار في لعبة ركلة الجزاء حرمه من مباراة العودة وفي العودة اتظلمنا من الحكم المغربي العرجون اللي محسبش ركلتين جزاء مستحقين للاهلي
الأهلي ده اللي في ٢٠٠٩ اتظلم في دور ال ١٦ وخرج بهدف تسلل واضح لصالح كانوبلارز النيجيري حسبه الحكم الاوغندي محمد سيجونجا وحرم الاهلي من تحقيق لقب تاني على التوالي بعد ٢٠٠٨
الأهلي ده اللي في ٢٠١٠ اتظلم من الحكم لامبتي قدام الترجي في طرد بركات في الشوط الأول و في احتساب هدف بأيد اينرامو
الأهلي ده اللي في نهائي ٢٠١٧ اتظلم من الحكم بملاك تسيما قدام الوداد وعدم احتساب ركلة جزاء صحيحة لصالح ازارو
الاهلي ده اللي في بطولة ٢٠٢١ اتظلم في مباراة فيتا من المغربي رضوان جيد في دور المجموعات باحتساب ركلة جزاء غير صحيحة على الاهلي كادت تكلفنا الخروج من دور المجموعات ورجع اعتذر بعدها
الاهلي ده اللي في البطولة الحالية ٢٠٢٢ اتظلم في اهم مباراة في دور المجموعات على ارضه امام صنداونز وبرضوا من المغربي رضوان جيد اللي تغاضى عن طرد حارس صنداونز في لعبة واضحة منع بيها هدف محقق وكان قبل تسجيل صنداونز هدف الفوز ولو طبق القانون كان الاهلي صعد اول مجموعته وتجنب اوائل المجموعات
مخرج المباراة ده مش زي اللي اخرجت مباراة الزمالك وحسنية اغادير ومعادتش هدف حسنية اغادير اللي لم يحتسب وخرج فوزي لجع المغربي يقول تصريحه الشهير كرة تجاوزت المرمى بالامتاااااار . مخرج مباراة الاهلي لو عنده سوء النية كان تعمد انه ميعيدش اللقطة من زاوية تانية انما هو اللي بارادته عرض الزاوية اللي الحكم مشافهاش والحكم نفسه اخد القرار وفقا لزاوية العرض اللي جت له من مسؤول اعادات ال VAR
الحكمين اللي اتشطبوا في افريقيا لامبتي وبطرس ماتبيلا كانوا طرف في مباريات اتظلم فيهم الاهلي سواء قدام الترجي ٢٠١٠ او الزمالك في سوبر ١٩٩٤
في النهاية رغم ان طبيعي جمهور الرجاء يتحفظ على ركلة الجزاء انما تاريخنا محدش يقدر يمسه وفوز الاهلي امبارح كان اقل نتيجة ممكنة وتوفيق كبير للرجاء باعتراف المغربي يوسف شيبو
الاهلي زعيم القارة ب ١٠ القاب لانه المنظومة الانجح في افريقيا والرجاء اكيد مش من ٢٢ سنة محققش اللقب نتيجة ظلم تحكيمي !!
مش هنسمح باستغلال حالة في مباراة الذهاب عشان تكون مبرر لظلم تحكيمي يحصل لنا في المغرب زي ما حصل مع بيراميدز قدام نهضة بركان في نهائي الكونفدرالية كتعويض عن اللي تعرض له حسنية اغادير ونهضة بركان في الكونفدرالية قدام فريق تاني في بطولة قبلها. واحنا عارفين الدنيا في ال CAF بتمشي في الحالات دي ازاي !
واخيرا للي على راسهم بطحة وبيتهم من ازاز يسكتوا احسن لان تاريخكم عارفينه وحافظينه من ايام حكام الشوبينج وضربات الجزاء الوهمية باعتراف رموزكم وفضيحة ماتبيلا في السوبر وفضيحة الكونفدرالية فاللي زيكم يستخبى
